BRW.txt

wir lan die phaffen syn vuortan
wer lernet uns kristelichez leben
wer git uns wib tzuo rechter e wer toufet uns die kynt
wer sol vuor sunde uns buoze geben
wer sol uns uz dem banne lan
wer wiset uns ob wir mit senden ougen werden blynt
wer helt nu stete ritterscaft
sit man nicht swert durch schyrmen segent witwen unde weysen.
wer git uns unses herren trost wer hat diu kraft
daz er uns schyrme vuor engestlichen vreysen
wir weren doch vuorirret gar hete wir der phaffen nicht
die valschen lant ir orden phlegen unde habe wir myt dem rechten lebende phlicht
der ban unde echte synt eyn tot
des liebes unde der sele gar
swer mit den tzwen geschulden hin vuor recht gerichte kuomet
des nemet ir hoen edelen war
gedenket an die selben not
ich wene die krummen recht unde ir gewalt dar lutzel vruomet
des lybes irge ein ende hat
tzuo hant so man die echte of in mit gantzer volge bringet
diu sele vuor dem banne in grozen ruwen stat
swen sie der helleschyrge hin vuor synen meister twinget
scaffe es eyn izlich biderbe man daz er der sorge werde vry
swer von den banne yn die echte kuomet daz ist nicht guot und wonet keyn selde by
owe der werlde werdicheit
din nympt an manigen tugenden abe
man sicht der truren vil die wol tzuo vreuden sind gestalt
mit libe unde ouch an richer habe
mit willen sunder hertze leit
die selben hat betwngen des diu schande unde ir gewalt
daz sie sich rechtes haben bewegen
die man da heizet werde diet ir truwe tzucht und ere
ir hoer muot ist leider vil nach nider gelegen
swa daz gescicht daz haz ich an den edelen richen sere
waz sol ein trozzen des man nicht vuor sunde und ouch vuor ere phliget
waz sol ein guot daz wider lib noch sele envreuwet noch schanden ane gesyget
eyn rechter babes der solte vuorgeben
dem sundere syne missetat
ein rechter keyser solte richten gar an allen haz
sit daz ir recht nicht rechte an stat
des krenket sich ir beider leben
daz tzymet dem babes nicht got selbe gebot yme daz
daz er tete wider ubele guot
nu wil die ubele mit der guote die kristenheit vuorsniten
ein rechter babes der lieze dem keysere valschen muot
er lieze ouch nicht durch in die armen kristen uberriten
wil er volenden synen tzorn so wirt ir beyder schulde groz
sule wir da under sin vuorlorn so werdent sie da umme lucifers genoz
man seit daz neman edele ensy
nicht wen der edeliche tuot
unde ist daz war des muogen sich genuge herren schamen
de nicht vuor schanden sint behuot
den wonet ouch valsch unde irge by
die dry vuorterben milte unde ere und ouch den edelen namen
we ym daz er ie guot gewan
der sich die schande unde irge lat von hohen eren dryngen
der solte sehen die armen hoch gemuoten an
die da myt gantzer hubescheit kunden wol nach eren ryngen
des ist ein armer wol geborn der truwe milte und ere hat
so ist er ein ungeslachter gar swie riche er si der scanden bi gestat
mir tuot vil maniger also eyn wib
die haz iren werden manne treit
vil dicke umme anders nicht wan umme ir selbes missetat
daz ist doch nieman also leit
also ym ob icht ir boser lib
der dinge tuot das ym unde ir an eren missestat
got weiz(...) wol also gescicht ouch mir
swelich richer herre an tugenden unde an eren gar vuortirbet
waz rechet(...) er ob ich myn schalten gar vuorbyr
unde er mit hazze und ouch myt nide mynen schaden wirbet
nu reche uns beiden got diu leit die wir gar ane schulde tragen
den biderben man an bosen wiben unde mich an allen argen bosen tzagen
ez wenet maniger daz er sy
der er nye wart noch nymmer wirt
unde lebet in dem wane also vil gar in gouches siten
den selben selde gar vuorbirt
unde ist ouch gantzer tugenden vri
ime ist sin mut tzuo kurtz tzuo lane tzuo breit tzuo smal gesniten
er wil sich nynder vugen hin
da er tzuo rechte horet unde mit guoten vuogen were
er wil sich tzucken vuor daz heiz ich toren sin
kumet er tzuo hobe so tzeiget er sine lugeliche mere
er hie er dort er dort er hie sus kan er wenken durch daz iar
er vo er voxs mit kundicheit da mite wenet er sich twren gar
wie sol ein singer sich bewarn
sint man die lob vuor smeychen hat
unde ouch diu byspil vuor ein spot sin twingen vuor schelten tzelt
swelich herre sich des nicht an lat
der mac myt eren wol gevaren
dem sint ouch singer gute tzucht ob er die rechten welt
waz weiz an syme hertzen der
der mir myn lob tzuo losen git min twingen tzuo eyme schelten
der wil daz er myn unde ich sin tzuo vriunde unper
daz solte er of den holten slan wes lezt er mich ungelten
got weiz daz wol daz ich den biderben guotes noch gesprochen han
daz ich daz nicht durch losen tete ich wande ich hete recht unde wol getan
wie swert man nu der herren rat
ich sage ü wie man wilen swuor
sie rieten truwe milte und ere werdichlichen muot
sie rieten daz man schone vuor
an erge sunder missetat
sie rieten daz vuor vluochen und vuor schelten hie was guot
do muosten ouch die herren sweren
daz sie den guoten reten by mit gantzer volge weren
unde sich der argen scalche wolten weren
der herren vil vuorterben mit ir tugentlosen meren
nu sicht man herren unde ir rat die beiderthalben hant gesworn
da von der rete vil vuorscroten wirt daz wer allez baz vuorborn
eyn pulber wilen wart gebrant
daz vromt ein scalc of rinder tot
unde set ez an die weide da man of die rynder trieb
er rieb ez under saltzen brot
der tiubel bracht ez uz beyerlant
unde schuof daz da der guoten rynder lutzel lebende blieb
da von uns leider sint irlegen
der eren phluoge sit daz uns die oxsen sint vuorstorben
wir han noch viere wolten die geliche phlegen
der tzuoge sone were wir an buwe nicht vuortorben
eyn moyn ein irch ein hirtz eyn rynt alsus die viere synt genamt
der hete wir tzuo eyner phluoge genuoch wen daz uns irch an lanken ist vuorlamet
der herren guot unde herren namen
tzuo rechte neman solde han
nie wen der myt dan beiden ordeliche kunde leben
daz ist unherlich tan
swer sich nicht wil untruwen schamen
unde ouch der grozen kirge da man solte um ere geben
die han ouch ich vuor herren nicht
sie muozen anders denne wol an myme sange veigen
sus bin ich hie scheiden von der werden phlicht
des muochte ir suomeliche lichte an myr irtzeigen
eyn schelten daz von myr of yn von synen schulden gat
daz gab eyn bichteger tzuo buoze myr vuor alle myne myssetat
ich han geklaget unde klage ez an
wol tzwentzich iar e baz unde baz
unde muoz ouch an myn ende klagen den vursten vriderich
eyn reynez hertze sich nye vuorgas
kegen graven vrien dienistman
ritter unde knechte die worden alle by ym rich
er hette von yn swes er gert
swa man dem lande ere werdichliche solde beherten
ir ellen was in manigen striten goldes wert
doch sint sie kegen vienden noch vil guote schiltgeverten
vil werder kuninc uz beheymer lant wiltu dich kegen vienden scarn
so hilf dem biderben uz osterrich unde habe of myr dir mac nymmer missevarn
ich han durch tzucht vil tzuchtelich
da her alle myne leit gedaget
nu wollen sie von tage tzuo tage e lenger breiten sich
a herre got dir si geklaget
daz truwe unde ere in osterrich
scham unde tzucht die milte tugent swindent daz klag ich
ane twanc let man die iungen wesen
des vorchten sie nicht daz sie ieman wolle of ere tzehen
nu ratent wise vriunt wie daz ich suole genesen
sit daz die richen edelen wellen tugende vlehen
e wilen was die tzucht so wert daz man ir tzuo allen orten gert
nu hat ez sich vuorkeret so daz man die iungen tugende nicht enlert
swer syne vriunt vuorsuochen sol
durch helfe daz sie vergesaget
dem ist vil we geschen daz er tzuor werlde e wart geborn
swen er in synen kummer klaget
ab er icht grozer smehe dol
sie lougenen sin tzuo vriunde ouch muoz er liden iren tzorn
ich horte wise liute sagen
daz neman sich vuorkunnen muoge yme misselinge
dar umme wil ich an myr selben nicht vuortzagen
waz ob myr die selde noch vil lichte vreude bringe
die mich so lange hat vuormyten gewinne ich ymmer selden teil
so mag ich irer helfe unbern unde laz ich in ir vunden heil
swer syne ruwe anz ende lat
der tuot als eyn unwiser man
der hette ein hus gebuwet wol uz edhelen holtze guot
do quam ein tzornich viur dar an
do stunt sin syn sin muot sin rat
nicht anders denne lesche herre also noch vil maniger tuot
biz ym daz viur vuorge die tuor
do muost er selbe unde sin guot gar in dem hus vuorbrynnen
diz bispil lege ich myr unde tummen liuten vuor
daz wir den sunden vuor dem todhe untfliehen unde untrynnen
hette der selbe unwise man gewunnen also rechten muot
so het er vuor des viures kraft sich selben uzgetragen und ouch sin guot
owe daz maniger valschen muot
jn hertzen gar vuorborgen treyt
unde honeget mich doch mit dem munde stete tzaller tzit
daz ist der sele unsteticheit
daz selbe dunket mir nicht guot
swer mit valschem hazze tzuo allen tziten of myr lit
swa er myr viure wisen wil
da darb ich anders nicht wen tiefe wazzers vuorde suochen
swa er myr wazzer wiset da vind ich viures vil
sus getaner schult vuordient er tzuo aller tzit myn vluochen
swaz er mir seyt ez si weich daz ist noch herter wen ein steyn
swaz er myr seit ez sy swartz daz ist noch wizer dan ein helfenbeyn
nu scouwet an den sumer guot wie er al der werlde vreude git
der reynen wrtz ir suze iz krut heyde und walt getzieret lit
die voglin hohent iren sanc der hymel hat gereynet sich
des sol der wercman geeret syn der also bilde sceffen kan
daz reyne wib ir liebez kynt dar tzuo den wol gemuoten man
unde ouch des liechten meyen blic wie suze er nu dunket mich
so er in der besten wirde lit
dar nach so kumpt ein rife myt getvange
der vuorturbet bluomen unde vuorkeret die wunnichliche tzit
unde scheident sich die vogelin von gesange
wibes schone unde mannes kraft stent in der wirde wol dritzich iar
so leit diu erde an sie ir stric des nemt an myner mude war
owe der manichvalten not die al der werlde kumftich ist
man sicht von hohen kuningen unde von schonen vrouwen swachen myst
ir mynnichlicher schyn wirt dort gar bitterliche(...) stalt
solte ez da mite ein ende han daz were der sele ein selicheit
ir lib hie semfte hat yrkorn vuor ymmer werende wunne breit
in wirt ein widerwexsle dort mit(...) ruwen manichvalt
daz were ob neman lege tot
unde ouch der helle witze nicht enwere
wir muchten doch daz alter vorchten daz ist ein tegeliche not
daz liebe kint des vater wol umbere
swen ez den vryunden widerstat daz alter kumpt mit manigem schaden
nu sich of werlt des tuot dir not du bist of truren her geladen
diu sele ist luter also eyn glas so sie der touf erwaschen hat
die meylet unser bruoder lib mit ungetaner missetat
der swane ist an der vederen wiz unde synt ym doch die vuoze swartz
die vert von uns rechte also eyn blas unde lat den lib tzu phande hye
den wormen er eyn spise wirt ez stet ir dort got weiz wol wye
der tot dem libe ende git alsam dem lieche tuot der snartz
owe daz eva den apfel beiz
daz hat(...) unser afterkunft erarnet
des vorchte wir die dorne hie daz uns begiuzet iamers swerz
da bi(...) suole wir alle sin gewarnet
die tageweyde die wil hyn der abent siget vaste tzuo
swer rechte tuot des sit gewis deme kumpt ein liechter morgen vruo
unse herre hete adame geben jn paradyse wunne vil
ez was ym allez undertan wilt unde tzam unz an ein tzil
eyn kleyne obiz er in vuorbot des ne vuormiden sie leider nicht
eyn slange ez even ezzen hiez adam der az ez offe rat
owe daz sie is nicht eyne untgalt hie von vil maniger kumber hat
waz(...) ob(...) eyneme(...) kuninge noch also gescicht
der(...) der kronen hat gewalt
groze richeit unde wil nicht scande myden
ich wene ez in der tiubel riet sit sie da umme worden gevalt
da von wir alle kumber muozen liden
sol ich untgelten der sculde daz(...) eva den apfel az
so untgelte ich des ich nye genoz krist herre nu gevuoge ez allez baz
owe da mite wir synt geborn unde also muoz ez enden sich
die engele blasen of ir horn tzuo iungest also dunket mich
sie tunt uns kunt(...) wol of untfant uwer lon daz ist wol recht
ist aber icht genaden da so vraget die iamerliche schar
ja da ist gnade vil wer sie tzuo rechte(...) bringet da
man sicht in eyner wirde sten den herren unde(...) den knecht
nach lone also sie ez vuordienet han
do sie in der werlde lebeten in vryen muote
sie sliefen al tzuo lange die wol wisten wie ez solte irgan
nu wachent sie owe in(...) pyne huote
daz du so lutzel vreude gis werlt lange leit unde kurtze tage
des ist da nicht achterruwe me wen yamer endelose klage
got vuor der werlde missetat von dorne er eyne krone truoc
do in die ungetoufte diet mit naegelen an ein krutze sluoc
er keyser ir suolt danken dem der uch(...) gehohet hat
sit ir der kristen kronen tragen den got tzuo troste goz sin bluot
er keiser danket ouch dar an unde waz got anders mit ü tuot
nu richtent under der kronen so daz uwer sele werde rat
horent ir die armen schrien owe
von ungerichte wie tzymet daz deme riche
waz ob vil lichte geluckes rat an sulhen dingen stille ste
so vorchte ich daz diu selde uch gar untwiche
ich horte e tzuo pulle da groz wunder von gerichte sagen
nu richtent hie daz wirt ü lieb swenne uch die viere hin tzuo grabe tragen
der gevatter unde der vole tzan tzuo grozen noten sint tzuo swach
vuor smahe vient unde kleyne wunden dicke prubent ungemach
by grozeme guote vuorscamet muot da ist tzucht unde ere vri
manich tzunge sprichet suoze wort unde schuzet doch den angel dar
ein wiser man der mynnet got waz der gesprichet daz lezet er war
treit sware buorde groz ubermut da kiese ich(...) toren bi
schame ist vuor der tzungen guot
tzucht eret wol den alten myt dem iungen
eyn reyniz wib mit guoten siten git werden manne hoen muot
schame ist yr ersten rechtes vil vuordrungen
sver git der ist lieb daz habe wir an den buochen wol gelesen
sit sich der werlte hie hat vuorschamet so werbe wir daz wir dort genesen
nu scouwet wel eyn sunder art der stork irkennet syne tzit
diu kleyne swale und ouch der swan swen ez ym kegen dem tode lit
der tumme mensche irkennet nicht den der in gebildet hat
uber den stein der slange veret unde of dem mere schiffes ganc
in den luften aren vluch der vindet selten myn gedanc
unde ouch des iungen mannes muot der under tzwantic iaren stat
der ar iunget aber wol
daz habe wir von der wisen liute lere
der slange nuwet iren balc hie by man wunder pruoben sol
des mannes alter nuwet sich nicht mere
swer nach den achzich iaren gat mit valweme hare unde ane stab
als ez(...) in der werlde stat der gicht daz got diu selde yme gab
genuge herren sin geswachet so daz ich(...) in vuorgan
sie muozen dienen ane danc ob ich ez tzuo rechte irkennen kan
in ist geschen also eyme blinden der(...) synen knecht vuoriaget
da nyeman wan sie eyne sin da muoz der blinde al eyne stan
tzuhant geruwet ym die vart swen er der wege nicht kan gegan
daz meyne ich an die(...) herren die nu leider sind vertzaget
an eyme milten kuninge guot
der sie da hat gerichet vil willichliche
der hoer herren dienist wach owe wa quam ir mannes muot
sie lobent lichte eynen ergeren scadenriche
die hant in selben in den vuoz gestecket eynen wexenen dorn
nu hynkent lieben herren sit ir hant den milten kuninc vuorlorn
ich han der swaben wirdicheit in vremden landen vil gesen
da worben sie nach brise also daz man yn wirde muoste ien
nu wil ich in ir lande varen sie sie daheyme synt gemuot
swer mir daheyme unde anderswa von schulden muoz bevallen wol
er sie gewis daz ich yme tuo mit dienste also ich von rechte sol
ist daz ich yne vinde so daz er vuor valsche ist behuot
eyn lob daz uz der kunde veret
daz hat der wisen volge in vremeden landen
ist maniger der mit scalle guot duorch roum bi den vremeden tzeret
unde lebet daheyme in grozen houbetschanden
swer beider lob behalten wil der ere sin hus daz ist myn rat
daz wazzer nynder ist so guot so da ez uz von sprungen gat
so starken man ich nye gesach ich wene er inder si bekant
der eyne muoge betwyngen hoe buorge unde wite lant
enhat er(...) der hulfe nicht ym muoge an beiden missebarn
die liute synt tzuo grozer not unde ouch tzuo kurtzewile guot
ich hore sagen swer gerne iaget daz er den hunden liebe tuot
daz sie of der rore unde der(...) verte icht widervarn
sit daz man hunden lieben sol
daz sie of der rechten verte icht widerkeren
so tzymet ouch guote handelunge an unvuortzageten helden wol
sie helfent vil gewaltes irme herren
betwngen dienest duorch vorchte wirt da ist der liebe gar geswigen
swer holden vriunt an strite hat der mac wol vyenden angesigen
getruwer vriunt vuorsuochtez swert die tzwie(...) sint in noten guot
sie sint wol hoer erren wert der sie hat dicke wol behuot
getruwe vriunt des wortes darftu nymer mere dich geschamen
truwe vil der tugende hat truwe ist valschem hertzem gram
truwe leschet missetat sie machet got ir selber tzam
truwe unde ere unde got die(...) vuogent wol tzuosamen
truwe ist ein rechte selicheit
unde ist daby nicht wankel an ir muote
des lib ist grozer ere wert so wol dem hertzen daz sie treit
ie barmet sich den armen al tzuo guote
enpor lat die truwe vuor die hie(...) werlt wol geeret hat
vuor schande balde hinder die tuor ir vuoget scanden missetat
troume hant mir vil gelogen unz her alle myne tage
unde in slafe myr betrogen da bi ich ouch ein ander klage
daz mich ein tzage triuget der mich(...) manigen schaden birt
elbe triegent nicht so vil junge und alte also ez mich tuot
swenne ez mich betriegen wil a herre got gib mir den muot
daz ich mich da vuor gesegene(...) ez ist gar ob mir vuorirt
ez lezet mich vil selten vry
swa daz ich vare ez ist of mir gebeyzet
vil manigen michel wunder nympt und wil mich vragen waz ez sy
ez ist ein dinc daz man mir wol untheizet
unde mir daz liuget daz ist myme troume worder wol gelich
swenne er mir saget ich habe guot so bin ich in dem slafe rich
wer helfet mir an syner stat des helfe mir was vil gereit
ich lige sere in iamers bat wer wil durch syne werdicheit
mir helfen so daz mir noch vreude werde baz bekant
den wille ich tzuo herren han mit dienste also ich von rechte sol
unde wil ym wesen undertan wes hertze ist reyner tugenden vol
der sich des underwinde daz er biete myr(...) die hant
hie mite synen werden gruoz
daz er spreche vriunt ich wil dich losen
von aremuot die by dir ist ich wille dich machen sorgen buoz
gehabe dich wol unde schilt ouch me die bosen
swa(...) du riche scalke sichst so vliuch von in ich wil dich neren
ein scalc erne git dyr nymmer nicht laz in sin guot myt scalken tzeren
nu ratent alle die nu leben unde ouch bi guoten witzen synt
in welhem lande vrouwe ere habe ein reyne gebende kynt
daz nicht wen milter werke phlege baz dan ie milter man gephlac
als ich daz wort hie vuor gesprach do wart ein vil gemeyne rof
do riefen iene unde dise got mylter herren nye geschof
den graven wilhalm von hynesburc der(...) gerenden ostertac
dar ne horet nu wen bieten tzuo
die hende swer sin guot untfahen welle
nu saget wer so groze milte in al der werlde tuo
swaz man der gebenden ieman vuorgetzelle
des milten salatines hant gesete um ere nye so witen scaz
noch nye man der ie wart geborn des sy in al der werlde traz
diu scande stiget unde velt in dirre werlde an selden(...) kuor
sie brichet sere mit gewalt unde ouch an rechter werde vuor
die phaffen unde leyn muozen gemeyne leisten eyn gebot
des werde rat wen daz man seit swer sere an grozen scanden sy
der werde keyner sunder wan von rechten houbetsunden vry
die sele kegen den tiubele vert vil gar unschuldich ist ir got
got git dem eren gerenden guot
vil tugenden vuore da by ware mynne
so git der tiubel den die mit scanden synt also gemuot
daz sie mit sunden bergen unde gewynne
waz sol ym lib waz sol ym guot waz sulen ym ouch riche lant
wer sich al hie beschelten lat unde ouch der helle wirt bekant
eyn vuler apfel smecket nicht unde ist tzu horde gar unwert
so lieben vryunt man noten sicht des in dem huse wirt gegert
nach syme tode drier tage diz merke swers(...) geloben wil
swaz nu bi dirre werlt gescicht daz ist noch me vuor uons geschen
wen daz die truwe nie vuorschiet so gar als wir nu muogen spehen
der hymel hat vuorwandelt sich die sunne unde ouch der sternen vil
der beben sin wir erdencloz
die sterne risen brunnen sint vuorsunken
der hagel twinget uns die vrucht des wirt menschen kumber groz
wes mac bi dirre werlt die wisen dunken
der nu den himel hat irkorn der geilet uns by unser habe
ich vorchte sere unde wirt ym tzorn den slegel wirfet er uns herabe
gregorius babes geistlicher vater wache unde brich abe dinen slaf
unde schaffe daz of vromder weide icht irre loufen dine schaf
ez wassent iunger wolbe vil die sint in truogelicher var
lambarten gluot in ketzerheit warumme leschestu des nicht
sint daz man der dyner schaf so vil in ketzervuore sicht
sie schenken dir von golde ein twalm da von(...) bistu in sunden gar
dem riche hilf daz recht behaben
daz sterket dich unde alle kristlich orden
denke an den der sich vuor uns bot tzuor marter unde sich lie begraben
la tzwischen dir und ym nicht hazzes horden
so wirt der din geloube starc der kristenheit unde birt nicht abe
so suole wir pruben eyne vart vuor sunden hin tzuo gotes grabe
so we dir guotes richer man an truwen unde an eren kranc
gedenkestu ymmer an den tot der e die bosen des betwanc
daz sie tzuor helle muozen varen durch iren girichlichen muot
unde hetestu hie tusent lant der volget dir tzuor erden nicht
mere den ein lynnen tuoch nu merke wel ein tzuoversicht(...)
hie mite so ist diu arme sele grozer pyne umbehuot
sin wib nymt eynen anderen man
hie mit so wirt der sele gar vuorgezzen
ir bosen richen unde ir argen da gedenket an
ich meyne wer die scande hat besezzen
teilet uwer guot den armen mite unde mynnet got daz ist myn rat
tuot ir des nicht so wizzet daz die helle kegen ü offen stat
swer kostelich ein hoez hus von holtze wol untworfen hat
die sule groz die wende starc of vier ammen gedillet stat
die tor bespenget unde mit guoten slozzen wol bewart
den versten uzer mazen ho mit guoten hengelboumen slecht
mit larzen da oben of gestreuwet die wite unde ouch die lenge recht
swan ez den gar bereite si so suolt ir merken of der vart
lezet manz dan bliben ane dach
die grozen sul unde ouch die starken wende
so ist ez gar ein wint ich wene ich ein tzuo wiene sach
unde nam da von vil lesterlich sin ende
sint ez der regen unde der sne al eine sunder dach begreif
die tzwey die schuofen in kuortzer vrist daz ez an eren gar tzuosleif
eyn edel grave wol geborn der wont in ostervranken lant
lenger e baz unde baz wirt er in tugenden wol bekant
sus wil er myt truwen unde myt eren tzuo syme grabe komen
her hat eynes rechten herren lib her hat eyners rechten herren muot
er ist geborn von hoher art daz beste er vil gerne tuot
des hat er sich von kyndes iugent unz her vil wol angenomen
der wile er ungenennet ist
ir muoget wenen ez sy der kastellere
neyn tzware hern is es nicht her wirt genant in kurtzer vrist
her heizet boppe unde ist schanden lere
von hynnenberc ist her geborn das hus ist von al sulher art
daz ez nicht boser herren birt des hat ez sich unz her bewart
ich gan dem edelen kuninge wol daz ym syn dinc tzuor wunsch irge
unde trag ouch ym dienste gunst wer ym myt truwen bi geste
wen er so rechte kunicliche vuore in allen dingen hat
wer er nicht eynes kuninges kynt man solt in doch tzuo kuninge han
also daz ym daz riche und ouch diu krone were undertan
als sie von rechten sachen sol die krone uf syme houbete stat
her hat beiaget in siner iugent
den pris daz ym gewalt durch vorchten niget
daz enirret nicht syn mylticheit sin reyne hertze sin edele tugent
daz er in rechter kuninge vuore of stiget
nu sitzet er of geluckes rade wil er daz ez yme wenke nicht
so richt er waz die armen klagen so git ym got tzuo selden phlicht
swa herren sterben daz ist schade des muochte doch wol werden rat
wen daz ir suomelicher hie so gar unnutzen erben lat
der guot vuortirbet des sich vil der guoten liute solden nern
man sicht in walde riuten ouch man sicht in buwen breite velt
man grebet in silber unde golt diu straze unde aller wazzer gelt
daz dienet in da bi sicht man sie scatz vil snodelichen tzern
so we myr we der alter vuorlorn
sit man der iungen sicht so vil vuortzien
unde ymmer we daz ich vuor suomeliche han so vil gesworn
ich wante daz er welte um ere lien
eyn guot den armen den die richen edelen helfe sculdich synt
ich wil den bosen nymmer klagen der uns hie let eyn boser kynt
so sich der lib vuorwandelt hie und daz die sele von uns vert
unde sie nicht hat des sie bedarb we daz der werlt ie was beschert
sulich angist unde sulhe tzuovuorsicht man wol bedenken sol
diu werlt in kranker vuore lebet swer ez tze rechte irkennen kan
wie sie nach tode lonet yn den daz guot wider erbet an
we daz diu sele nicht sippe hat des wirt die helle leider vol
nach tode ir nyeman phlegen wil
si en achten nicht den wie siez guot geteilen
die hette wilen do sie lebte mage unde vriunde vil
wa synt sie nu die sie vuor sere heylen
er ist geschen als uns gescicht wir borgen of den lesten tac
unde setzen hie die hohen phant die neman dort gelosen mac
da ich ein lob irnuwen sol daz ane dach so manigen tac
gestanden ist unde ane bant ia wen ich ez eman rechte mac
gerichten als ob syn von iugent myt vlize were vil schone gephlogen
da ym die sule sin worden vul unde daz die rennen sint untzwey
und ez diu scande durchvlozzen hat da stet myn blicken vuor eyn ey
swaz ich ym nuwer nagele sla wir sin da mite doch gar betrogen
so rouch ez tzuo ganzer stete nicht
da man sie sol tzuo hohen eren phlichten
den man von iugent unz an sin alter ymmer in houbetschanden sicht
wie muochte ich den in eren werche richten
vuor war so sult ir wizzen daz er sint vuorscamter koche kint
unde scameloser muoter barn die an tugenden so vuorweiset synt
ez wolte eyn affe uber eynen se do kunder wol geswymmen nicht
her bat eyne schorpen daz sie yn vuorte als die abentiure gicht
es satz in of die bulen syn unde vuort in verre in den tich
do her quam mitten of den wach ez sprach ich wil tzuo grunde gan
dune gebist myr daz hertze din oder ich wil dich irtrinken lan
der affe bot ym vuor daz hertze sine lide gar gelich
ez en wolte nicht wen daz hertze syn
daz schorpe vloz dem lande eyn teil tzuo nahe
der affe spranc unz an daz lant dar umme quam die schorpe in pyn
daz sult ir vuor eyn bispil ouch vurfan
der keiser der ist komen uz unde ist gesprungen an den stat
ir mete gerenden schorpelin her tuot uch dar umme an selden mat
ich weiz der herren manigen ob ich het ir eynes guot
ich welt ouch verre baz wen er vuor scanden syn behuot
ich welt ouch baz die sele vuor des tiubels banden neren
ich wolt ouch varendez guot durch got und ouch um ere tzeren
ich wolt ouch valscher eide nicht von hertzen vil gesweren
kegen vriunde wolt ich duldich sin kegen vienden hoch gemuot
ich wolt ouch rechter vuore phlegen
unde wolte valsche lan
unrecht gewynnen guot des wolt ich mich vil gar irwegen
mich duchte daz were allez wol getan
ich wolt ouch hazzen valschen rat den schalke den liuten tzuo oren tragen
da von die herren worden wert wie lutzel sies in nu vuorgesagen
mir ist ein lob irluschen deme ich doch vil dicke tzuo
mit guoten spruchen blete ich wen ich ez ymmer me getuo
daz ich myn lob vurzunde da man ez irleschen lat
eyn milter man der solte ungerne volgen scalkes rat
da von ein lob irleschet daz in gantzer wirde stat
sie ne raten anders nicht den abent unde den morgen vruo
nicht wen da laster von gescicht
daz ratent sie vil gar
eyn wib die missetaten hat die ne gan irer tochter nicht
daz sie ane var mit willen wol gevar
sie seit ir vil der mere vuor wie sie in ir iugende habe gevarn
sam tuot ein scalc dem herren syn den er vuor tugenden wil bewarn
ich hete ein spil so guot daz ich gewynnes mich vuorsach
ich leite da steyne unde ouch gebot also ich ez von holtze brach
ich leite e willichliche da des holtzes eynen span
ich was so vro ich wante daz spil gewunnen solte han
ich wolte ez me vuorboten han do wart ez understan
ez nam vuorlustichlichen abe daz ich von tzorne sprach
nu wes unselde of geselt
wie han ich guot vuorlorn
daz hete ich mir unde mynen kynden an myn hus getzelt
ich hete es tusent eyde wol gesworn
swenne ich da leite myn gebot ez were ein spil gewunnen gar
swenne ich ez me vuorbyeten wil so wille ich nemen der bunde war
ich bin getruwer manigen man den er ym selber sy
den ich wol ganzer eren gunde unde daz er were vry
vuor sunden unde vuor schanden des gan er ym selber nicht
swer mich da umme hazzet daz ist gar von valscher phlicht
owe waz des an tugendelosen scalken nu gescicht
sie wenet ich sie durch ir guot si gar mit losen by
des eyner syme kinde gan
kegen den er truwe hat
gan ich den ouch wol guotes des muter ny mit mir began
der sunden der ie wib myt manne begat
der sol mir deste holder sin sint unse sippe ist uz getzelt
swer daz durch syne untugende lat der si den tiubel of geselt
des rynes site wiste ich wol unde was myr lange kunt
daz sie ires hares so wol phlegen des untgiltet sere ir munt
ir tugent ist kranc ir milte ist iunc daz han ich wol gesen
man muoz die hoen herren umme ein ezzen sere vlen
er muoz gar geluckich sin swem da sol guot geschen
sie sint so milte sam eyn grozer starker scafehunt
swem ich da klagete myne not
unde myne hertzeleit
der iach her wider er were selber vil nach hungers tot
mit armer hocvart sint sie vil gemeit
ir gabe unde ouch ires kurtz gewandes wil ich ymmer me unpern
ir aller lib ist also unreine daz sie wollen keyner eren gern
ich weiz eyn wib unde eynen man solte ich die tzwe gesen
daz ich ir tzuo manne unde sin tzuo wibe muoste ien
des were genuoch vromeden unde ir beiden kinden not
ez lac hie vur ich wene ein man ich ne weiz wie lange tot
den hiez got selber of stan unde machete uz steynen brot
la herre got der wunder eynez an disen tzwen geschen
daz uz dem manne werde ein wib
unde uz dem wibe eyn man
unde sich vuorwandele unde vuorkere also ir beider lib
sin ellen manlich hertze nye gewan
eyn wibin wib ein mennyn man die tzemen wol eyn ander by
ein mennyn wib eyn wibin man die solten sin wol eyn ander vry
lobete ich die richen bosen und ir sundichliches guot
wa were denne komen hin myn unvuortzageter muot
ich wille yn nach ir wirde gerne singen mynen sanc
unde wille mit lobe die milten kronen sunder valschen wanc
die hoch gelobeten biderben sulen mir des ymmer wizzen danc
daz ich myn lob ym gar vuorsage swer lesterlichen tuot
waz sol ir lib waz sol ir leben
waz sol yn richer hort
ich meyne die nach sunden unde nach houbetscanden streben
die selben sin vuorlorn hie und dort
ir eren gerenden mynnet got und lazent bliben werenden haz
sit des gewis daz got guoter milter liute nye vuorgaz
ez geschet vil dicke an maniger stat daz wib gewaltes phliget
unde doch vil selten wib dem manne strites ane gesiget
ein menlich man der understunden des gewaltes vil
er spreche vrouwe dune solt tuon nicht anders denne ich wil
la mir mit dir geliche tzehen in der eren tzil
tustu des nicht ich wene mannes tzorn of dir geliget
eyn wib die guote witze hat
die teile yrem manne mite
so daz sie mit yres wybes muote gebe truwen rat
und wende iren muot of reyner wibe site
an hoem lobe(...) eyn werder man mit guoter kiusche ein reynes wib
der name ir orden wol an tzemet unde wirt gelobet ir beyder lib
swa man den kunsten richen varenden man ungerne sicht
als ich bescheiden wil da hat man lichte an schanden phlicht
der schirge ist bose nachgebuor swa dieb gehuset hat
swa daz der dieb in diebes wise bi den liuten gat
unde er gedenket dan an syne groze myssetat
her gedenket were gerichtes unde ouch der schirge nicht
so welt ich sin ein vrier dieb
unde stelen myr genuoc
waz wuorre were mir neman holt unde wer ich neman lieb
mir diente doch der acker unde die phluoc
dem dinge tuot eyn scalc gelich der gote und ouch sich selben stilt
unde ist dar umme neman holt wen der myt ym die diube hilt
ich muoz vil dicke an maniger stat des guotes armer sin
so tunt ouch mir die milten herren dicke ir helfe schin
den spreche ich dar nach als ich sol unz an mynes endes tzil
da bi duld ich von bosen liuten spottes altzuo vil
ich kome tzuo manigem herren derz myr wol irbieten wil
so stent die orendriusel hinder myr unde spotten myn
swie gerne ich sunge guoten sanc
der dunket sie eyn wicht
sus wenen sie lieben sich unde machent myr diu gabe kranc
swer myr sus gebe der git myr danne nicht
so syn ouch myne gedanken so unde hete der herre mylten muot
er lieze es durch die scalke nicht her ne gebe myr durch sine tugende guot
nu merket wer den kargen klage swen er gescaffet daz
daz ym sin wib und ouch sin kynt um irge sin gehaz
sie gunnen ym des todes wol die mage sprechent ouch
daz er in in den ougen sy vil gar eyn swinde rouch
unde tzu allen tziten bi den liuten eyn vuorscamter gouch
so sprechent ouch der syne vil er truwen lerez vaz
so singent ouch der pfaffen vil
der wider misse of in
so vluochent witewen unde weisen daz ist des tiubels spil
wa wil der tzage myt syme guote hin
so schiltet in die varende diet unde dankent ym die armen nicht
owe dir irge daz du bist der bososte val von dir gescicht
nu merket wa eyn blynder get vuorluset er den knecht
im ist die ruwe an tzweren vuozen sam die straze slecht
im ist die tiefe alsam der vort swen er dem wazzer nahet
im ist die dynster nacht geliche lecht alsam der tac
wen er ne wederz ane wisel nicht irkennen mac
er struchet bi dem sunnenschyne ob er tzuo balde gahet
des ne mac ich ym gewizen nicht
ez ist so maniger blynt mit liechten ougen
der wol daz ungeverte bi der rechten straze sicht
unde irre vert vuor schanden sunder lougen
wie leiden haben den wisel vuorlorn der unser solte phlegen
wer grifen selber nach den phaden wir struchen bi den wegen
swes lob vuornegelt wirt daz nicht ein meister buozen kan
der wellet an den eren daz vil lichte ein kundich man
an syner wirde eyn struchen spuret und ouch ein hynkent sciere
dar nach eyn vallen des er sich nymmer me sit irholt
ob man synen eit tzuobrechen wil daz er ungerne dolt
ir sint in myme lobe me erhunken danne viere
der starke nagele sint geslagen
hin durch die tugent unde anderthalb vuortzwicket
ez ist ouch war ich ne kan ü weiz got anders nicht gesagen
waz man mit swinden worten da gebicket
sie sint an gantzer wirde unde an den eren gar vuorlamet
phrut umme die anderen die sich haben an eren sus vuorscamet
eyne dinc wonet genugen liuten by daz nicht an eren vrumt
unde datzuo an selicheit vil selten wol bekumt
ez bliebet gar vil underwegen daz an uns armen wirret
man gicht der eyne sy getruwe unde habe der vuoge nicht
man gicht der ander habe an sunden unde an scanden phlicht
der dritte eyn weynich wol getzogen die dry sint gar vuoryrret
man gicht der vierde sy ein degen
des libes unde eyn arger tzage des guotes
man gicht der viunfte kume synes libes schone phlegen
unde sy da by vil gar vuorscampt des muotes
man gicht der sexste mynne got die wile ist gar vuorlorn
get ez von hertzen nicht unde an der tugende hat vuorkorn
ich buwe eyn hus der ynne wil gesynde wesen
der tzadel und der tzwibel sint mit here da vuor gesezzen
der mangel unde werfet so gewaltichlichen da yn
nu ratent liebe vriunt wie ich muoge genesen
untugent unde der herren erge die habent sich vuormezzen
daz sie mir tzuo eyner syten wenden spise unde och den wyn
so blet tzuo der dritten siten dar
untruwe unde ir gesynde
dar tzuo byn ich in der vuor scanden echte gar
die reche sint tzuo der vierden siten swynde
sit mich untugende mit yr her also besezzen hat
unde mich vuorterben wil daz wende der herren tugent den iz lesterlichen stat
ich bin des graben kumfte vro von osterberc
so vro daz mir sorge von den vreuden sint vuorswnden
gar sit ich den tungendenrichen wol gesunden han gesen
her werket wol mit tzuchten werdichliche werc
er ist an tugenden unde an rechter milte vunden
des hore ich ym die wisen unde dar tzuo die besten ien
ir stiget of an verdicheit
so sicht man manigen sigen
ich bin gewesen da man der herren strite streit
da horte ich sin tzuo guote selten swigen
sie ient er si sunder meil vuor allen valsche vry
unde in dem munde nicht wen eyner tzungen phlegen so hat vil maniger dry
ich byn des edelen werden kunings milte vro
da ynne er lebet und da by phliget so tugentlicher guote
des syn lob von sculden ho in al der werlde stat
des edelen keisers kynt wille ich ü pruben so
ein walt von tugenden unde von rechter milte bluote
der kunde halb er nicht getragen die tugent die er begat
er ist alsam ein reyne berender boum
der obiz mit willen reret
er aller milte ist gegen der sine gar eyn troum
sin hant vil manigem syne gulde meret
noch iamert mich daz ich des eyne nye gegen ym genoz
ez en irret sin milte nicht wenne myn unselde ist leider altzuo groz
iunc unde alt riche unde arm helfet mit mir klagen
des vursten tot uz beyerlant wer sol uns nu irgezzen
der grozen truwe die man stetichlichen an ym vant
dem keiser unde dem kuninge ist hulfe an ym irslagen
er kunde daz riche also berichten unde also besetzen
daz ez ane alle werre stunt uber alle diudische lant
daz lant uber mere were gar verlorn
wenne syne starken rete
der babes unde der keiser hetten grozen tzorn
die sunne machte her myt truwen stete
er schuof ouch daz der kuninc blieb an syner rechten e
also er ez gescaffen habe got gebe daz ez ym dort baz erge
owe dir werlt owe ym der dir volgen muoz
din lon ist valsch du gis den angel nach der suoze ymmer
du tzuhes mir den halm also eyner iungen katzen vor
ich habe an dynen wec gesetzet mynen vuoz
ez ne wille got ich wane daz ich dir langer volge nymmer
du treist untruwe unde allen haz of dime rucke ampor
din leben ist sam ein richer troum
der nach dem slafe vuorswindet
du has in mynen munt gestecket eynen tzoum
der mich der witze nahen hat vuorblyndet
nacket wart ich tzuo dir geborn unde scheide ouch bloz von dir
eyn lynin tuoch vuor myne scame unde anders nicht gis du tzuo none myr
so we myr armen we daz ich so rechte weiz
wen ich quam unde wer ich byn unde waz ich werden muoze
dar an sold ich gedenken wol daz wer der sele heil
nu ist des lanc daz ich mich des von kynde vleiz
nach al der werlde lone die hat mich in ir suoze
dar an gewiset daz ich han myt manigen sunden teil
ich han leider gar vil vuorborn
des guoten daz ist myn vorchte
unde weiz ouch wol ich han vuorschuldet synen tzorn
dar mich unde al diu werlt uz nichte worchte
mir ne kome helfe ich bin vuorlorn in lange werende leit
rose ane dorn nu troste mich des ist myr not unde al de kristenheit
swer sich myt vremden liuten wil
bewerren dar sol suonen mit den kunden
wil er der viende machen vil
daz schadet ym ob er vuoret vriunde veile
nu merket an den von osterlant
wie dem gelungen sy an syme teile
do er an den vienden nicht ne vant
do solt er an den vriunden han irvunden
myn rat den wisen wol behaget
man sol den vriunt tzuo grozen noten behalten
swer viende vliut unde vriunde iaget
sol dem gelingen des muoz ouch gelucke sere walten
wie ob der vriunt tzuo viende wirt unde tzuo den vremeden swert
da scicht ein klemme da von ym unselde wirt beschert
nieman sol guot vuor mir vuorsparn
sint daz ich gedenke vil der iare
han ich der lande vil durchvaren
so ken ich ouch der dorfe deste mere
ich kan ouch deste baz gesagen
wa mit der man vuorluoset wirde unde ere
swar ich daz indert muoz vuordagen
daz vromet vuor scanden nicht kegen eyme hare
ich wil och unvuorworfen syn
die wile unde ich geroren mac die tzungen
so tun ich mit gesange schin
ob ich ein schelten pruben kan den alten unde den iungen
ich meyne die alten die mit scanden haben gelebet von kindes iugent
dar tzuo meyn ich die iungen die da wassen ane tugent
swelich herre ez mit den vursten hat
in dem geliche als erz mit truwen meyne
unde of in prubet valschen rat
die hat sich tzuo des wolbes art gesellet
swen er da nach den manne gat
tzuo holtze unde anders nicht wan ob er vellet
tzuo hant so wirt dem wolbe gach
wie er of ym kum mit listen der unreiyne
ir vursten set den vuozen vuor
daz ir uch vur den valschen wol behuoten
die man an wolbes wyse spuor
das understet e daz der valsch bi ü begynne bruoten
von eynen halme wirt eyn viur untzundet der ez nicht understat
da von ein hus untbrynnet daz ez an die schure gat
eyn wort der keyser otte sprach
daz ich unz an myn ende wil behalten
klaget ym eyn valscher ungemach
des truwe er in unde uzen wol irkante
er sagete mir ist umme dich
des setz ich myne warheit dir tzuo phande
rechte als dir ist umme mich
der stete sul wir kegen ein ander walten
eyn valscher vriunt mit worten klaget
ob syneme lieben vriunt icht leides wyrret
wil er gelouben des er saget
so ist er mit des valschen mannes rede gar vuoryrret
wir willen daz der geloube sy ane guote werc vil gar ein wicht
als ist ein valscher man myt rede an den syn vriunt nycht huolfe sicht
sit ich nicht grozer dorfer han
noch der guoten stete in witen landen
so bin ich doch der sorge irlan
daz ich durch vorchten neman durbe diene
wen wer ich herre in osterlant
e ich vuorluore die guoten stat tzuo wiene
ich welte e riten of den sant
zuo nyurenberc da mich die liute irkanden
an metze were myr nicht tzuo vil
tzuo riten nach des werden kuninges hulden
der mir zuo traffe schiez eyn tzil
daz welt ich holn e ich vuorlure dry lant von mynen schulden
sulde unde schade secht die beide muocht ich verre baz vuortragen
wen diu werden dienestman die kund ich nymmer vuollen klagen
c str. 1
got hat adam und even geben imme paradyse wunnen vil
adame tet er undertan gar wilde und zam bis uf ein zil
ein obs das du soldest miden dur selhe ungemach
der slange es even essen hies nu esse dus ouch uf ir rat
mir ist niht leit das dus niht eine engulte und es dú werlt niht kumber hat
es kam also daz einem iungen kúnige alsam geschach
dem ouch der krone was gedaht
richeit unde ere wan das er niht wolde miden
einen schalk dem hat der tiefel valschen rat ze munde braht
da von sie beide ein sures múosten liden
sun wir engelten des und das adam und eve den apfel as
so engulte ich des ich nie genos got herre fuege ins alles baz
c str. 2
gregorie babest geistlich vatter wache und brich abe dinen slaf
du wende das in froemder weide irre lovfent diniu schaf
es wahset iunger wolve vil in trugelicher wat
lamparten gluet in ketzerheit warumbe leschest du das niht
das man so vil der diner schafe in ketzer vuore weide siht
si schenkent dir von golde ein trank das dich in súnden lat
dem keiser hilf sin reht behaben
das hoehet dich und alle geislich orden
gedenke wol das got die marter umb uns leit und wart begraben
la zwischen dir und im niht hasses horden
so wirt der vride und der gelovbe stark und nimt niht abe
so suln wir prueven eine vart vúr súnde hin ze gotes grabe
c str. 3
owe der manigvalten not dú al der werlte kúnftig ist
wan siht us schonen frowen und us kúnigen werden swachen mist
ir vil minneklicher schin wirt bitterlich gestalt
solde es da mit ein ende han das wer der sele ein selekeit
der lib im senfte hat erkorn vúr iemer wernde wunne breit
es wirt ein widerwehsel dort mit rúwe manigvalt
es wer ob nieman lege tot
und ovch der helle wisse niht enwere
wr moehten fúrchten doch das alter dast ein tegelichú not
das liebe kint sins vater wol enbere
swenne er den lúten widerstat das alter kumt mit mangen schaden
nu sich uf werlt des get dich not du bist mit iamer uberladen
c str. 4
da mitte wir nu sin geborn da mitte muos ovch enden sich
die engel blasent uf ir horn ze iungest also dunket mich
da muossen wir ze buosse stan der súnden das ist reht
ist aber ich genaden da so spricht dú iemerliche schar
ia da ist genaden vil swer si ze rehte bringet dar
wan siht in einer wirde da den herren und den kneht
got sprichet dis leit ich dur dich
mine wunden bluoten mir vil sere
wir leben in der werlte in vriem muote das erbarme dich
herre got dur diner marter ere
das uns niht geschehe als in wir sparens uf den lesten tag
wir setzen hi dú hohú pfant diu nieman dort erloesen mag
c str. 5
so starken man ich nie gesach und wene ovch nieman si bekant
der eine muge ertwingen vil der hohen búrge und witú lant
hat er der helfe niht er mag an beiden missevarn
die lúte sint ze grosser not un ovch bi kurze wile guot
es si ein man der gerne iaget das er den hunden liebe tuot
das si ze ruore und uf der verte kunnen sich bewarn
sit das man hunde lieben sol
das si uf der rehten vart iht umbe keren
so zim ovch werdú handelunge an unverzagten lúten wol
die helfent vil gewaltes und maniger eren
betwungen dienst durh vorhte ein frúnt da ist der liebe gar gewigen
swer holden frúnt an(...) strite hat der mag wol vienden an gesigen
c str. 6
gevatter und fúli zant an grossen noeten sint ze swach
smehe viende und kleine wunden dike fuegent ungemach
hat swach geburt gros ubermuot da kiesent toren bi
manig zunge sprichet suesse wort da doch der angel stichet dar
ein wise man der minnet got swas er geret das lat er war
hat richer man verschamten muot der ist gar eren vri
dú schame ist vor der zunge guot
zuht eret wol den alten und den iungen
ein schoene wib mit reinen sitten git werdem manne hohen muot
guot hat der minne reht ein teil verdrungen
swer git der ist lieb das han ich an den swarzen buochen wol erlesen
sit sich dú werlt hie hat verschamt so schaffen das wir dort genesen
c str. 7
swer kostekliche ein schoene hus mit holze rehte entworfen hat
die súle gros die wende stark uf dremel wol gedilet stat
gesprenget wol und das die túrn mit slossen sin bewart
der virst in rechter masse erhaben mit starken hengelbovmen sleht
dar uf mit latten wol gestroeit an hoehe und an der wite reht
ob es nu gar bereitet si mich dunket an der vart
lat ers beliben ane dach
die tremel súle und ovch die starken wende
das wurde ein niht ich wene ich ir eines wilent ze wiene sach
das nam da von vil lasterlich ein ende
als es dú nesse und ovch der sne mit winde und ovch mit tache ergreif
si schuofen das in kurzer vrist an eren es vil gar zersleif
c str. 8
genuoge herren hant sich so geswachet des ich in erban
si muossen dienen ane dank ob ichs rehte erkennen kan
in ist geschehen als einem blinden der den kneht veriaget
swa nieman wan die zwene sint da muos der blinde alleine stan
zehant gerúwet in dú vart als er der wege niht kan gegan
das mein ich an die herren die nu leider sint verzaget
an einem kúnige der ir pflag
und richet al da her vil willekliche
owe war kan ir mannes muot wie hohe er herren dienest wag
si lobent lihte ein ergers sicherliche
si hant in selben in den fuos gesteket einen wessen dorn
nu hinkent lieben herren sit wir han den milten kúnig verlorn
c str. 9
ich weis der herren manigen und hete ich ir eines guot
ich wolde bas vor schande sin behuot
ich wolde ovch das die sele vor des túvels banden nern
ich wolde ovch varnde guot dur got und ere bas verzern
ich wolde ovch valscher eide von herzen lúzel swern
gedultig sin gegen frúnden und gegen vienden hohgemuot
ich wolde ovch rehter vuore pflegen
und wolte die valschen lan
unreht gewinnen guot des wolde ich mich vil gar bewegen
mich dunket das were alles wolgetan
ich wolde ovch hassen boesen rat die schalke den lúten zorn traget
da mite die herren wurden wert swie lútzel mans in vor gesaget
c str. 10
man siht vil dike an manger stat das wib gewaltes pfliget
und das ir selten wiben man ir sites an gesiget
ein mennin man der understuende des gewaltes vil
der spreche frowe du solt niht anders tuon wan das ich wil
la mich mit dir geliche ziehen in der eren sil
(...)
ein wib dú guote witze habe
dú teile ir manne mitte
also das im in wibes guote gebe getrúwen rat
das er sich wende an werdekliche sitte
in hohem muot ein mennin man in suesser kúsche ein reines wib
der name ir orden wol gezimt und ist gelobt ir beider lib
c str. 12
man giht das nieman edel si
wan der edellichen tuot
und ist das war des mugen sich wol genuoge herren schamen
die niht vor schanden sint behuot
ia wont in valsch und erge bi
dú zwei verderbent milte und ere un ovch den edelen namen
ovwe das er ie guot gewan
der sich die schande und erge lat von mangen eren dringen
der solte(...) sehen die armen wol gemuoten an
wie die nach ganzen wirden kunnen ringen
ein armer der ist wol geborn der rehte vuore in tugenden hat
so ist er ungeslahte gar swie riche er si der schanden bi gestat
c str. 13
merkent an dem sumer guot was er der werlte froeide git
manig wurze und ovch ir krut heide und walt gezieret lit
dú vogelin hoehent ir gesang der himel reinget sich
des so der werkman geret sin der ellú bilde schepfen kan
das reine wib ir liebes kin dar zuo den wolgemuoten man
zahi des liehten meisen blik vil schoene er dunktet mih
swie lange ir in der wirde sit
vil schiere kumt ein rife mit getwange
der velwet bluomen und verkeret sich dú wunnekliche zit
und scheident sich die vogel mit ir sange
wibes schoene und mannes kraft sint in der wirde niwan drizig iar
so leit dú erge an dich ir strik des nim in diner muede war
c str. 14
merkent war ein blinde ge verlúset er den kneht
dem sint die ruchen fúr antwerk alse die strassen sleht
im ist dú tiefe als der furt wil er dem wasser nahen
im ist dú vinster naht gelich als der liehte tag
der enweders ane wisel niht erkennen mag
er struchet bi der sunnen schin wil er ze balde gahen
des mag ich im gewissen niht
es ist so maneger blint mit liehten ovgen
der wol das ungeverte bi im uf der strassen siht
und irre vert in schanden sunder lovgen
wir leigen han die wisel florn die unser solten pflegen
nu grifen selbe nach den pfaden wir struchen bi den wegen
c str. 15
es wenet maniger das er si
das er nie wart noch niemer wirt
und lebt doch in dem wane also vil gar nach govches sitten
da bi in ere gar verbirt
er ist och hovbettugenden vri
dem ist sin muot ze kurz ze lang ze smal ze breit gesnitten
ern wil sich niender fuegen hin
dar er wol horte und iedoch von allem rehte were
er wil sich zuken fúr das heisse ich toren sin
kumt er ze hove da seit er sin lugelichen mere
er hie er dort er dort er hie sus kan er wenken dur das iar
er vohe er fuhs mit boeser kúndekeit wenet er sich túren gar
c str. 16
sit got us siner hantgetat
wol schaffet swas er herre wil
und nieman des sin meister ist und nie sin meister wart
und doch des nieman git ein zil
sit ichs in sinne han die stat
swenne er uns wil gebieten uf die langen hervart
da mehten wir toren kiesen bi
das wir uns niht mit vlize enzit uf die selben reise wol reiten
und ir doch nieman zwei hundert iare wirdet vri
e sol der iegeslich sinnig man erbarmdige leiten
die im fúr angest hulfen fúr swenne er sich muos der vart bewegen
da sol min kristes muoter wol und der getrúwe sant johannes pflegen
c str. 17
got dur der werlte missetat ein dúrnin krone truog
do in dú ungetovfte diet mit nageln an das krúze sluog
her keiser niget im sit er úch so gehoehet hat
sit ir der kristen krone tragent dien er ze troste gos sin bluot
so merket was ir selden habt und was er wunders dur úch tuot
so richtet ovch mit der krone das der sele werde rat
hoeret ie die armen schrien we
von ungerihte wie stat das dem riche
so fúrhte ich das gelúkes rat noch vor dem riche stille ste
ir rihtet hie so tuot ir selekliche
sit das wir alle hoeren von gerihte das ze púlle sagen
so rihtet ovch hie das wirt ú lieb e das úch die viere zem grabe tragen
c str. 18
ich han so vil gesungen das manger nu geswuere wol
ich hete gar gesungen us ich han noh ganze winkel vol
der kunst dú reht an singen zimt als ich sie bringe vúr
ich wolde e gar swigen e ich niemer me gesunge niht
das ich schande also verswige der leider alzevil geschiht
und das ich minen suessen spruch an valscher milte flur
durch vorhte maniger swigen muos
der ovch dur losen lop den argen singet
den selben wirt ze lone kume ein danken und ein valscher gruos
swer toren froeit und ir gemuote ringet
ich bin vil dike alsam gefroeit dar nach ze truren mir geschach
do mir niht bas gelonet wart und ich doch lob mit trúwen sprach
c str. 19
swa herren sterbent das ist schade und sol doch wol werden rat
wan das ir eteslicher hie so gar unnútzen erben lat
der guot erstirbet des sich vil der lúte solde nern
wan siht in welden rúten vil und darzuo buwen breitú velt
wan grebt in silber und in golt dú straze und al der wasser gelt
das dienet in unde siht man si doch kleinekliche zern
so we mir we der alten florn
das man die iungen siht so vil verzihen
und iemer we das ich vúr eteslichen han so vil gesworn
an dem ich wande er wolde umbe ere entlihen
sin gut dien kumberhaften den die richer gernde schuldig sint
wir suln den argen iemer klagen der uns hie lat sin erger kint
c str. 20
nu ist das rich und ovch dú lant vil gar an iunge herren komen
der alten wirde und ovch ir zuht da hant ir wunder von vernomen
nu wúnschent das der megde kint vergesse ir missetat
nu werbent aber die iungen so das wir die alten muossen klagen
da von das man si siht bi guote und ovch an werdekeit zergan
nu wissent doch das es den edelen richen niht wol stat
nah lobe ir eteliches muot
so vaste strebt als ich iu wil bescheiden
das er niht anders bete me wan habe din lob la mir min guot
der wil sich minen suessen sprúchen leiden
vil gar die wile unz ich ersihe wies im an werdekeit ergat
dar nah so singe ich lihte ein lob das nahe bi dem schelten stat
c str. 21
so we dir welt so we im der dir volgen muos
din lon ist krank du gist den angel iemer nach der suesse
din du treist untruwe und allen valsch uf dinem rugge enbor
ich han in dinen weg gesetzet minen fuos
es werde got von himle so wene ich dir volgen muesse
du zuhest mir den haln als einer iungen katzen vor
din lon ist als ein richer trovn
der nach dem slafe swindet
du hast in minen munt gestriket dinen zovn
da von min lip in diner lere erblindet
ze dir ich nakent war geborn und scheide ovch blos von dir
ein linin tuoch fur mine schame und anders niht gist du ze lone mir
c str. 22
als ieman kumt der von der stirmarke vert
ob er den tugentrichen sehe von orte
und ob er si gesunt und ovch mit froeiden lebe
si sprechent alle er si der schanden gar verhert
und das nu lúzel ieman lebt der sich im des genehe
das er so willekliche als er nah hohen eren strebe
als ovch gesunt mit froeiden si
so wirde ich vro der mere
dar nah zehant so wont mir sa ein truren bi
des ich vil lihte und ovch vil sanfte enbere
und das nu lúzel ieman lebt die vri als er von schanden sin
der vinde ich leider fúnfe niht von ungerlant ze berge unz an den rin
c str. 23
ich bin des edeln werden kúniges milte fro
dar ine er lebt und da bi pfligt so tugentlicher guete
da von sin lob von schulden stiget und hohe stat
des edeln keisers kint die sol man prisen so
und stuende ein ganzer walt von tugenden und in milter bluete
der konde nie mer volle tragen die tugende die er begat
er ist als ein rein bernde bovn
der obs mit willen reret
ir aller milte ist gegen der sinen gar ein trovn
sin hant vil manigen sin gúlte meret
des iamert mich wan ich der eine nie gegen im genos
es irret ovch sin milte niht wan min unselde dú ist alze gros
c str. 24
so we dir werlt din werdekeit
dú nimt an mangen tugenden abe
wan siht ir truren vil die wol ze froeiden sint gestalt
an libe und ovch an richer habe
mit willen sunder herzeleit
die selben hat betwungen des dú schande und ir gewalt
das si des rehten hant verpflegen
das man da heisset werdú fuore trúwe zuht und ere
der besten froeide ist leider nu vil nah gelegen
swa das beschiht das muet mich an die richen edeln sere
was sol ein truren das man niht vúr sunde und ovch umb ere pfliget
was sol ein guot das weder lib noh sele froeit noch schanden an gesiget
c str. 25
mir tuot vil manger als ein wib
dú has ir werdem manne treit
vil dike umbe anders niht wan umb ir selben missetat
und ist ovch nieman also leit
als im ob ir vil valscher lib
der dinge ist tuot das im ald ir an eren missetat
got weis vil wol als ist ovch mir
swa richer herre an tugenden unde an werdekeit verdirbet
was richet er ob ich mit schelten in verbir
und er mit nide und ovch mit hasse in schanden uf mich wirbet
nu rich uns beiden got dú leit dú wir ane alle schulde tragen
den biderben man von boesen wibe und mir von tugendelosen argen zagen
c str. 26
wie swert man nu der herren rat
ich weis wol wie man wilent swuor
wan riet in truwe und ere und allen werdeklichen muot
si rieten das man schone fuor
an erge sunder missetat
si rieten das fúr fluoche und ovch vúr schelten were guot
do muesten ouch die herren swern
das sie den hanzen reten bi mir rehter volgen weren
hie milte wellent si sich valscher fuore weren
der herren vil verdurbet von den trugelosen meren
ich weis dem herrn ist sin rat und ovch sin volge als e gesworn
das eteswa der eide vil verschroten wirt die weren bas verborn
c str. 27
ich han der swabe werdekeit in froemden landen vil gesehen
da wurben si nach prise also das man in wirde muoste iehen
nu wil ich in ir lande ervarn wie si da sin gemuot
swer mir da heime und anderswa von schulden muos gevallen wol
der si gewis das ich im tuon mit sange als ich ze rehte sol
ist das ich in vinde al so das er vor schanden ist behuot
ein lob das us der kúnde vert
das hat der wisen volge in allen landen
vil maniger underswilent guot dur gúde bi den froemden zert
den man daheime siht in grossen schanden
swer beide lob behalten wil der ere sin hus das ist min rat
das wasser niender ist so guot so da es von sprunge uf gat
c str. 28
swer sine rúwe an das ende lat
der tuot als ein unwiser man
der gebuwen hat ein hus mit schonem holze guot
do kom ein zúrnig fúr dar an
do stuont sin sin sin wort sin rat
uf anders niht wan loescha herre als noh vil maniger tuot
do im vergie das fúr die túr
do muost er selbe und ouch sin guot in sinem huse verbrinnen
dis bispel kúnde ich mir und tumben lúten fúr
das wir den súnden vor dem tode enpfliehen und entrinnen
het ovch der selbe unwise man gewunnen e den selben muot
so het er vor des fúres kraft sich selben us getragen und ovch sin guot
c str. 29
ein lob ist manigen lúten bi das niht an eren frumt
und ovch ze kranker wirde dort an selekeite kumt
da niht belibet under wegen swas an uns allen wirret
wan seit von eime er si getrúwe und anderre vuoge niht
der ander hat mit kúndekeit gegen valscher fuoge pfliht
der drite ein wening wol gezogen die sint da mit verirret
wan seite der vierde si ein degen
des libes und ein arger zage des guotes
wan seit der fúnfte kunne wol sin selbes schone pflegen
und si da bi vil gar verschamtes muotes
wan seit der sehste minne got dú wile ist ovch verlorn
get es von herzen niht und ander tugende hat verkorn
c str. 30
swenne ich von akers kum gewant
her in der tútschen habe
min kunst erschillet in dú lant
das eteslicher wol da vur geswuere
der niht vor schanden ist bewart
so mueze ich cristes grabe
niemer geleisten mine vart
ob ich die selben niht mit schelten ruege
die wile so gibe ich in alle vride
das ich ir laster offenber gesinge
und weis doch wol solt man mich loesen von der wide
das ich niht mag verlassen ald ich betwinge
und wei doch wol e ich ein argen zagen getwunge uf milten muot
das ich mit riemen liehter twunge einen stein das man im an der ader liesse bluot
c str. 31
swes lob also vernagelt wirt das niht ein meister buessen kan
das nimt an dien eren abe das lihte ein kúndig man
sin hinken an der wirde spurt dar nach ein struchen schiere
und nach dem struche ein vallen des es lihte niemer sich erholt
als man die niete nieten sol das es unsanfte dolt
ir ist da her in minem lobe verdorben mir wol viere
dien starke nagel sin geslagen
hin dur die tugent und anderthalp verzwiket
ich kan úch anders niht von in gesagen
swas man mit argen spriuchen uf si gebiket
so sint si doch an tugenden gar erlamt
tprútsch under dandern die sich hant an werdekeit verschamt
c str. 32
susa wie wunneklich der us oesterriche vert
sit er sich dur des obersten kúniges ere
libes und wibes guotes dar zuo der kinde hat bewegen
das er da her behalten hat wie schone er das nu zert
mich wundert swenne der kúnig hin gege sahsen keret
und er gegen akers vert welher da verdienen muge bas der selden segen
das ist ein selikichú vart
die got mit hundert tusent lonen giltet
swelh man sin guot dar uf erspart
der dunket mich ein govch swer in darumbe schiltet
het ich getrúwet solher dinge an den von osterlant
dest war im wer min schelten húte und iemer unbekant
c str. 32a
so sich der lib verwandelt hat und so dú sele von uns vert
und si niht weis wes si bedarf we das der werlde ie wart beschert
solh angest und dú zuoversiht der mensche bedenken sol
dú werlt in valscher vuore lebt swer si ze rehte erkennen kan
wie si nah tode lonet die das guot hie wider erbet an
we das dú sele niht sippe hat des wirt dú helle vol
nah dem tode ir nieman pflegen wil
sú gahen niht wan wie si das guot geteilen
si heten wilent do si lebten mage und ovch der frúnde vil
wa sint si nu die si von sere heilent
in ist geschehen als uns geschiht wir sparen unz uf den lesten tag
so setzen wir hie dú hohen pfant dú nieman dort erloesen mag
c str. 33
ein wort der keiser otte sprach
das ich unz an min ende wil behalten
klagte ime ein valscher ungemach
des trúwe er usse und inne wol erkande
do sprach er mir ist umbe dich
des setze ich mine warheit dir ze pfande
rehte als dir ist umbe mich
der stete suln wir gegen ein ander walden
ein valscher frúnt mit valsche klaget
swas sinem steten frúnde leides wirret
wil er gelovben swas er saget
so wirt der stete frúnt an sinem troste gar verirret
wan seit das der gelovbe si gar ane guetú werk ein niht
als ist mit rede ein frúnt den man niht an der helfe siht
c str. 34
swer sich mit froemden lúten wil
verwerren der sol suenen mit den kunden
wil er der viende machen vil
das krenket in ob er fueret frúnde veile
nu seht an dem von osterlant
wie dem gelungen ist ze sinem teile
dor an den vienden niht erwant
do solt er an den frúnden sin erwinden
mit rate den wisen wol behaget
wan sol ze not die kunden frúnde behalten
swer viende flúhet frúnde iaget
ob dem gelinget wol das muos vil gar gelúke walden
ist das der frúnt ze viende wirt und under zuo den froemden swert
da wirt ein klemmen das ir eime unselde wirt beschert
c str. 35
swelh fúrste nach dem keiser gat
dem gelich als ern mit trúwen meine
und uf in pruevet valschen rat
der hat sich zim in wolves wis gesellet
der slichet in dem walde nach
dem man ist das er struchet ald er vellet
zehant so wirt dem wolve gach
das er uf im gelige der valsche unreine
her keiser seht zem vuosse vúr
ir sult úh hinden wol mit witzen hueten
der úch in wolfes orden spúr
das understet enzit e das der valsch beinne brueten
von einem halme kumt ein fúr der niht sin zúnden understat
da von ein hus enbrinnet gar und an die schúren gat
c str. 36
wie wirt der richen argen rat
si wellent vúr noh hinder sich gedenken
vor gotte ist gros ir missetat
und sint ovch von der werlte hie bescholten
sie scheident von der werlte blos von gote hin
so hant si weder hie noch dort vergulten
wie trúget den sin kranker sin
der sich den tuvel las also beschrenken
das er zesamen hordet guot
das uf in wuochert súnde und da bi schande
wie we das an dem ende tuot
swenne ers berinpfen muos und er den kumber gerne wande
so hat er sich versumet gar sin spetú ruewe in kleine frumt
swenne er in zer helleporte vúr sinen meister kumt
c str. 37
ob ich niht grosser doerfer han
noch vil der grossen stette in witen landen
so bin ich doch des wol erlan
das ich durh vorhte lútzel ieman diene
were aber ich herre in osterlant
e ich verlur die guoten stat ze wiene
ich wolde e riten uf den sant
ze nuerenberg da mich die lúte erkanden
mich dúhte an mezzen niht ze vil
ze riten nach des richen keisers hulden
der mir ze trappen stieze ein zil
das wolde ich holn e ich verlur zwei lant an mine schulde
ich wil der witen lande ein ovch des grossen geltes gar gedagen
die edelen dienestman die wolde ich niemer me verklagen
c str. 38
merkent welh ein sunder art der storch erkennet sinú zit
der wije und ovch dú kleine swal wa si den kalten winter lit
der werde mensche erkennet niht den der in gebildet hat
al uber den stein des slangen vart und uf dem mer der schiffe gang
und in den lúften arn flúge nieman erkennet min gedank
noch eines iungen mannes muot der under drisseg iaren stat
der ar der iunget sich ovch wol
das hoeren wir von der wisen meister lere
der slange iungert sinen balk das hoeren wir singen und sagen
der werde mensche iungert sich niht mere
swer uf dú ahtzig iar kumt mit valwem hare und ane stab
als es nu in der werlte gat der iehe das im vro selde gab
ich weiz der herren manegen obe ich hete ir eines guot
ich wolte verre baz danne er vor schanden sin behuot
ich wolde och baz die sele vor des tievels banden nern
ich wolde och varnde guot umbe ere und och dur got verzern
ich enwolde valscher eide niht von herzen vil geswern
gedultic gein den frúnden sin gein vienden hohgemuot
ich wolde och rehter vuore pflegen
und och die valschen lan
unreht gewinnen guot des wolde ich mich vil gar bewegen
mich dunket das were alles wolgetan
ich wolde och hazzen rat den schal zer lueten oren tragen
da von die herren wurden wert wie luzzels ime des vor gesagent
ich wil dem cruce singen
und dem der dran die marter leit
ich han der werlde uf kranken lon gesungen leider vil
wie mac mir baz gelingen
an langer wernder selekeit
wes sol och der gedingen han der vert dar ich da wil
nu schaffe ein iegeslich wise man
das sin der engel pflege
swie vil der tievel danne valscher liste kan
der engel wert in doch der slehten wege
der schuehet alles ungeverte stige straz und och die stege ze troste wart uns allen
von einer maget ein kint geborn
der ist sin selbes vater und ist och sin selbes kint
wir waren gar vervallen
der ewichlich verlust verlorn
wir waren in der vinster mit gesehenden ougen blint
wir sin von ime ze liehte komen
swer das behalten wil
der helft rechen das ime ist sin lant genomen
sin cruz und och sin grab des ist ze vil
den gar verworhten die da mit uns haben ze leide ir reizen spil